TIRANA- Kreu i Partisë Demokratike Sali Berisha ka komentuar urdhin e Sekretarit amerikan të Shtetit Marco Rubio për diplomatët e SHBA-ve dhe qëndrimin që duhet të mbajnë ata lidhur me zgjedhjet në vendet e tjera. Berisha tha para mediave se politikat zyrtare të administratës së SHBA, bazuar në parimin ‘America first’ janë tashmë të qarta. Ai thotë se kryeministri Edi Rama nuk mori urim në emër nga SHBA-të. Sipas tij, Departamenti i Shtetit e tha që zgjedhjet nuk kanë qenë të lira.
Pjesë nga fjala e Berishës:
Politikat zyrtare të administratës së SHBA, bazuar në parimin ‘America first’ janë tashmë të qarta. Por për një vend anëtar të NATO-s, që zhvillon farsë elektorale dhe që nuk merr dot- se po ta lexosh të plotë atë udhëzim, thotë që sekretari Rubio uroi presidentin e këtij vendi për fitoren, uroi kryeministrin e një vendi tjetër për fitoren, po Edi Ramës nuk ka kush t’i shkruajë. Nuk mori asnjë urim.
Unë e kuptova se mjafton të lexosh mediat e tij se si u gëzuan nga deklarata. U gëzuan, u hodhën përpjetë me kryeartikuj, mirëpo harruan se me atë më ndihmuan mua se ata provuan se farsa ka ndodhur por nuk do na thotë kush gjë. Jo, nuk është e vërtetë. I pyetur, nga njëri prej gazetarëve më seriozë, i akredituar në Shtëpinë e Bardhë, Departamenti i Shtetit iu tha që zgjedhjet nuk kanë qenë të lira. Kaq është. Pra jo vetëm që nuk erdhi urimi, por u tha që zgjedhjet nuk kanë qenë të lira. Kështu që ky është komenti im.
