Prokuroria e Tiranës ka dërguar në gjyq ish-drejtorin e IT-së në Policinë e Shtetit, Ervin Muça, i cili akuzohet për ndërhyrje të paautorizuar në sistemin TIMS.
Sipas akuzës, Muça ka urdhëruar hapjen e portave USB dhe ka lejuar hyrjen e disa personave të paautorizuar për të asistuar në procesin e backup-it të të dhënave, një veprim që nuk kishte arsye të kryhej pasi sistemi automatike kryen backup në mënyrë të përsëritur.
Ndërhyrja ka ndodhur pas orëve të natës të 1 shtatorit 2023, dhe është vërtetuar se procesi i back up-it është realizuar duke eksportuar të dhëna në një hard disk të sekuestruar.
Prokuroria e ka akuzuar Muçën për “Hyrje të paautorizuar kompjuterike”, ndërsa çështja për shpërdorim detyre është ndarë për hetime të mëtejshme.
