Banorët e fshatit Kraps, në qytetin e Fierit, përballen prej vitesh me një problem të madh infrastrukture, konkretisht me gjendjen alarmante të një ure, e ndërtuar nga vetë ata 20 vite më parë. Kjo urë është e vetmja lidhje për rreth 25 shtëpi dhe rreth 100 banorë, shumica e të cilëve janë të shpërngulur jashtë për punë. Dështimi i bashkisë për të intervenuar në kohë ka bërë që kjo urë të degradojë, duke rrezikuar seriozisht kalueshmërinë e saj.
Banorët e Krapsit tregojnë për kamerën e Fiks Fare se shpenzimet për ndërtimin e urës u mbledhën nga dy fise të fshatit, por aktualisht ata nuk kanë më mundësi financiarë për ta riparuar atë. Gjatë dimrit, kur prurjet e lumit Gjanica rriten, kalimi përmes urës bëhet i pamundur, duke rrezikuar kështu jetët e fëmijëve që e përdorin atë për të shkuar në shkollë. Pa mbajtëse anësore, ata mund të bien në lumë, çka përbën një rrezik të madh për sigurinë e tyre.
Banorët kanë bërë disa ankesa në njësinë administrative, dhe sipas administratorit Zenel Selimaj, ai është në dijeni të situatës dhe ka kërkuar ndërhyrjen e bashkisë për riparimin e urës. Pas zgjedhjeve, topografët e bashkisë kanë bërë matjet e nevojshme për hartimin e një projekti për një urë të re. Arjan Ndreu, drejtori i ndërmarrjes së shërbimeve publike në bashkinë e Fierit, e ka konfirmuar se do të merren masa për riparimin e urës dhe se janë duke bashkëpunuar për ndërtimin e një ure të re që do të përmbushë standardet dhe do të mbajë automjete të tonazhit të rëndë.
Pas premtimit nga drejtori, punëtorët e bashkisë filluan menjëherë punën për riparimin e urës. Një skuadër e angazhuar po punon për të siguruar kalueshmërinë e banorëve dhe për të eliminuar rreziqet që lidhen me përdorimin e kësaj ure të dëmtuar. Megjithatë, vëmendja ndaj nevojave infrastrukturore të fshatit Kraps mbetet një çështje e rëndësishme dhe kërkon angazhim të vazhdueshëm nga autoritetet lokale.
