Ura e Zogut mbi lumin Mat, një monument kyç i trashëgimisë kulturore, vazhdon të jetë në rrezik të serioz shembjeje. Ndërhyrja emergjente e realizuar në vitin 2024 për stabilizimin e strukturës, e cila kishte si qëllim mbajtjen e saj funksionale, ka rezultuar vetëm një zgjidhje përkohësore. Reshjet e fundit kanë theksuar problemet, duke rënduar ndjeshëm gjendjen e urës. Prurjet e mëdha të lumit kanë dëmtuar elementët mbajtës, ndërsa këmba veriore ka shfaqur lëvizje të dukshme, duke vënë në rrezik qëndrueshmërinë e gjithë strukturës.
Paulin Zefi, specialist i trashëgimisë kulturore në Lezhë, apelon për ndërhyrje të menjëhershme dhe të plotë për të shpëtuar këtë monument të rëndësishëm historik dhe inxhinierik. Ai thekson se investimi prej 46 milionë lekësh nga viti i kaluar, i fokusuar në forcimin e njërës prej këmbëve të urës, e cila kishte rënë mbi 2 metra në shtratin e lumit, ka rezultuar i pamjaftueshëm për të parandaluar degradimin e mëtejshëm të strukturës.
Banorët dhe ekspertët shprehin dëshirën për një restaurim të plotë të kësaj vepre, e cila simbolizon arkitekturën e periudhës së Zogut dhe do të ndihmonte për rikthimin e identitetit të saj të dikurshëm. Vlerësimi i situatës dhe kërkesa për angazhim janë thelbësore për të mbrojtur këtë trashegimi të vyer nga rreziku i humbjes përfundimtare.
