Në Universitetin “Fan S. Noli” të Korçës, ka përfunduar faza e tretë e raundit të dytë të regjistrimeve për sistemin “Bachelor” dhe programet profesionale dyvjeçare. Deri tani, janë regjistruar gjithsej 482 studentë, 15 më shumë se në të njëjtën periudhë të vitit të kaluar.
Ndër këta, 369 janë regjistruar në programe “Bachelor”, ndërsa 113 në programet profesionale dyvjeçare. Fakulteti i Shkencave Natyrore dhe Humane kryeson listën me 190 studentë, i ndjekur nga Fakulteti Ekonomik me 127, Fakulteti i Edukimit me 103 dhe Fakulteti i Bujqësisë me 62 regjistrime. Megjithatë, disa degë si Frëngjisht, Gjuhë-Letërsi Shqipe dhe Gjuhë Pakicash nuk kanë regjistruar asnjë student.
Degët më të kërkuara këtë vit janë Infermieria, Mami, Sportet, Informatika, Financa dhe Anglishtja. Interesi është vënë re edhe në Fakultetin e Bujqësisë, sidomos në Teknologjinë Ushqimore dhe në programet e mësuesisë, të cilat kanë arritur numrin minimal të nevojshëm të regjistrimeve për hapjen e tyre. Procesi i regjistrimeve do të vazhdojë në raundet e dytë dhe të tretë.
Përveç regjistrimeve në ciklin Bachelor, në të njëjtën periudhë kanë përfunduar aplikimet për programet master shkencor dhe profesional, me gjithsej 463 aplikime. Prej tyre, 148 kandidatë janë regjistruar në masterin shkencor, ndërsa 315 në atë profesional. Fakulteti i Edukimit dominoi me 200 aplikime, e ndjekur nga Fakulteti i Shkencave Natyrore dhe Humane me 135 aplikime, Fakulteti Ekonomik me 88 dhe Fakulteti i Bujqësisë me 40.
Disa programe si Masteri Shkencor në Shkencat Bujqësore, Arsimi Special dhe Arsimi Fillor kanë tejkaluar kuotat, ndërsa masterat e tjerë kanë ende vende të lira. Këto të dhëna tregojnë një rritje të interesit për arsimim të lartë dhe profesionale në Universitetin “Fan S. Noli”.
