Sot në orën 13:30 do të zhvillohet në Gjykatën e Posaçme seanca për verifikimin e masave të sigurisë ndaj Jamarbër Malltezit dhe biznesmenit Fatmir Bektashi, sa i takon akuzave për privatizimin e ish-klubit “Partizani”. “Detyrim paraqitje” është vendosur për Sali Berishën, por ende nuk ka një datë për seancën ndaj tij. Fatmir Bektashi akuzohet se nëpërmjet shoqërisë “Homeplan” sh.p.k. i ka siguruar Malltezit dhënien e përfitimeve të paligjshme në vlerën 5.4 mln euro duke i paraqitur ato si të ardhura te ligjshme nga biznesi.
Por çfarë ka deklaruar Fatmir Bektashi në SPAK?
Në momentin që është pyetur nga prokurorët dhe hetuesit, ndërtuesi ka deklaruar se ka pranuar se Jamarbër Malltezi ka qenë pronari në hije me 60%, pra shumicë i firmës “Homeplan” që u krijua për ndërtimin e 17 kullave dhe se vetë firmoste çfarë i kërkonin.
“Shoqëria “Homeplan” është krijuar që në fillim me një marrëveshje verbale me shtetasit Jamarbër Malltezi dhe Xhimi Begeja, ku këta persona do ishin investitorë në formën e ndikimit tek pronarët e tjerë që të lidhnin kontratat e investimit me “Homeplan”. Por vetëm në vitin 2014 mesa shoh nga dokumenti është formalizuar juridikisht.
Të gjitha aktet që lidhen me aktivitetin e shoqërisë “Homeplan” si nga ana financiare dhe juridike i kanë përgatitur Andia Pustina dhe Laura Pustina dhe unë vetëm i nënshkruaja. Unë nuk kam marrë pjesë pra në procesin e vendimmarrjes por vetëm i nënshkruaja ato që përpilonte Andia Pustina.
Për nënshkrimin e çdo akti që lidhet me shoqërinë “Homeplan” unë shkoj tek zyra e Andia Pustinës, që ndodhet përballë librit Universitar dhe i nënshkruaj aty. Mua më telefononte Andia për të vajtur dhe për të nënshkruar…” ka deklaruar Fatmir Bektashi.
