Fotografi ukrainas Efrem Lukatsky ka publikuar imazhet e para të raketës së re kruz me rreze të gjatë veprimi, e quajtur “Flamingo”, e cila raportohet se ka hyrë në prodhim seri. Fotot janë realizuar më 14 gusht në një objekt të kompanisë ukrainase të mbrojtjes Fire Point, ku raketa ishte në procesin e montimit. Ndërsa specifikimet teknike zyrtare ende nuk janë publikuar, raketa duket se ka aftësi për të goditur objektiva në distanca mbi 3,000 kilometra.
Dizajni i raketës “Flamingo” ngjan me sistemin FP-5 të prezantuar më parë nga kompania britanike Milanion Group gjatë ekspozitës IDEX-2025 në Abu Dhabi. FP-5 ka një luftëmbajtëse prej 1,000 kg, rreze maksimale prej 3,000 kilometrash dhe përdor një sistem të kombinuar drejtimi, që përfshin navigimin satelitor. Vëzhguesit ushtarakë besojnë se “Flamingo” mund të ketë parametra të ngjashëm, por konfirmimi zyrtar i këtyre karakteristikave ende pritet.
Programi raketor ukrainas ka bërë përparime të rëndësishme në vitet e fundit. Raketat “Neptune”, të cilat u prezantuan në 2020, morën famë ndërkombëtare për herë të parë në prill 2022, kur shkatërruan kryqëzorin rus Moskva. Variantet e reja të Neptune tani janë adaptuar për të goditur objektiva tokësorë me rreze më të gjata. Po ashtu, Ukraina ka zhvilluar raketën taktike balistike “Grim-2”, e dizajnuar për një rreze deri në 500 km, si dhe sisteme eksperimentale për mbrojtje ajrore dhe detare.
Në fillim të këtij viti, Ukraina testoi një raketë ballistike të re, e cila është karakterizuar si më e madhe se ATACMS, me rreze veprimi rreth 300 kilometra, e pajisur me një luftëmbajtëse më të rëndë. Kjo raketë ka treguar precizion të përmirësuar në krahasim me sistemet e epokës sovjetike dhe është modifikueshme për të arritur deri në 500 kilometra për përdorim të brendshëm. Këto zhvillime tregojnë një angazhim të fortë të Ukrainës për të përmirësuar kapacitetet e saj të mbrojtjes.
