Dronët ukrainas goditën dy platforma nafte ruse në Detin Kaspik, njoftoi një zyrtar i Shërbimit të Sigurisë së Ukrainës (SBU). Sipas burimeve, dronët kanë sulmuar platformat Filanovsky dhe Korchagin, të cilat i përkasin kompanisë Lukoil. Këto sulme përkojnë me rritjen e përpjekjeve ukrainase për të penguar prodhimin rus të naftës dhe gazit.
Platforma Filanovsky ishte sulmuar më parë vetëm disa ditë më parë, duke e shënuar kështu sulmin e parë të këtij lloji gjatë konfliktit. Mësohet se dronët kanë shkaktuar dëme në pajisjet e të dyja platformat dhe kanë ndaluar prodhimin e naftës. Megjithatë, agjencia Reuters nuk ka arritur ende ta verifikojë këtë informacion dhe ka kërkuar komente nga Lukoil.
Nuk dihet ende se si Ukraina vuri në shënjestër këto platforma, duke marrë parasysh se Deti Kaspik është mbi 700 km larg kufirit ukrainas. Këto sulme vijnë në një kontekst më të gjerë, ku Ukraina ka kryer një seri sulmesh me dronë mbi objektet që i përkasin sektorit të naftës ruse, me synimin për të minuar burimet financiare të Moskës në luftë.
Me kalimin e kohës, Ukraina ka intensifikuar fushatën e saj, duke synuar veçanërisht rafineritë e naftës në pjesën europiane të Rusisë. Muajin e kaluar, përveç platformave, Ukraina ka goditur edhe anije cisternë që transportojnë naftë ruse përmes Detit të Zi, me tre anije të dëmtuara në dy javët e fundit nga sulmet me dronë detarë.
Ky zhvillim shfaq një ndryshim të strategjisë ukrainase në luftën kundër forcave ruse, duke synuar të dyfishojë presionin mbi industrinë e energjisë ruse në një kohë kur lufta vazhdon të intensifikohet.
