Kryeministri polak, Donald Tusk, ka njoftuar se Ukraina është e gatshme të vazhdojë luftën me Rusinë për dy ose tre vite të tjera, megjithatë në Kiev ekziston shqetësim se konflikti mund të zgjat deri në dhjetë vjet. Në një intervistë për The Sunday Times, Tusk theksoi se Britania e Madhe do të ishte në rrezik të drejtpërdrejtë në rast se Rusia sulmon ndonjë vend të NATO-s, duke kritikuar mungesën e shqetësimit publik lidhur me sigurinë kombëtare në Londër.
Tusk citoi presidentin ukrainas Zelensky, i cili shpreson që lufta të mos zgjat më shumë se dhjetë vjet, por shtoi se Ukraina është e gatshme për një angazhim të gjatë. Ai gjithashtu shprehu bindjen se Ukraina do të mbijetojë si shtet i pavarur, megjithëse shprehu shqetësim për numrin e viktimave potenciale.
Sipas tij, ekonomia ruse është në krizë dhe sanksionet e reja nga SHBA do ta bëjnë edhe më të vështirë mbijetesën e saj në afat të gjatë. Megjithatë, ai paralajmëroi se kjo mund ta nxisë Putinin në veprime agresive. Tusk theksoi se shërbimet e sigurisë polake vazhdimisht zbulojnë përpjekje sabotimi nga Rusia, kështu që çdo qytet evropian, përfshirë edhe Londrën, është në rrezik nëse Rusia vendos raketat hipersonike në vende si Bjellorusia ose Kaliningradi.
Në një reflektim mbi politikën evropiane, Tusk e përshkroi situatën si fundin e “epokës së iluzioneve”, ku siguria dhe paqja nuk mund të merren më si të mirëqena. Ai kritikoi liderët evropianë që flasin për rikthim marrëdhëniesh me Rusinë, duke thënë se çdo marrëveshje me Putinin nuk vlen as sa boja me të cilën nënshkruhet.
Në lidhje me migracionin e paligjshëm dhe krizën demografike, Tusk kërkoi reformim urgjent të Konventës Evropiane për të Drejtat e Njeriut. Ai tha se politikat për nxitjen e lindjeve nuk po funksionojnë dhe se problemi është më shumë kulturor.
Tusk theksoi se Polonia është duke i afruar standardet e jetesës me ato të Britanisë, duke e konsideruar Brexit-in një “gabim historik” që la vendin pa një aleat të rëndësishëm brenda BE-së. Ai paralajmëroi se Europa duhet të përgatitet për epokën e re të konfrontimeve, ku mbijetesa do të varet nga gatishmëria për të sakrifikuar.
