Izraeli ka vendosur të shënjestrojë pesë figura kyçe të Hamasit që operojnë nga mërgimi në Katar, si pjesë e një strategjie të re për të përballuar liderët e lëvizjes jashtë Gazës. Kjo vendosmëri erdhi pas angazhimit publik të Tel Avivit për të mos kursyer as liderët në diasporë, pavarësisht se ndodhen në vende si Katar, Turqi apo Egjipt.
Për të realizuar këtë qëllim, Israelit i janë identifikuar disa figura të rëndësishme. I pari është Khalil al-Hayya, i njohur si “arkitekti politik” i Hamasit dhe kritik i aleatëve si Egjipti, Jordania dhe Irani. Ai është një figurë e fuqishme në Hamas, e afërt me Yahya Sinwar, dhe është rikthyer në skenën politike pas sulmit të 7 tetorit.
Khaled Meshal, ish-kreu politik i Hamasit, gjithashtu figuron në këtë listë. Ai ka mbijetuar një tentativë vrasjeje nga Mossadi në vitin 1996 dhe ka pasur një rol të rëndësishëm në zhvillimin e politikës së lëvizjes, veçanërisht pas ngjarjeve të fundit.
Një tjetër figurë e shënjestruar është Zaher Jabarin, menaxheri i fondeve dhe lidhjeve në Bregun Perëndimor. Ai ka qenë një ish-i burgosur politik dhe aktualisht kujdeset për financat e Hamasit dhe rolin logjistik të Brigadave al-Kassam.
Musa Abu Marzouk, i njohur si zëri i marrëdhënieve të jashtme të Hamasit, lindur në Gaza dhe arsimuar në SHBA, po ashtu është një objektiv. Ai ka patur një rol të rëndësishëm në marrëdhëniet me vendet fqinje dhe në negociatat e fundit që rezultuan të dështuara.
E fundit, Husam Badran, strategu i intifadës dhe zëvendës i diasporës, po ashtu është shënjestruar. Ai ka qenë një figurë e rëndësishme në organizimin e sulmeve gjatë Intifadës së Dytë dhe ka lidhje të forta me donorët ndërkombëtarë.
Nëse këto sulme konfirmohen, ato do të përbëjnë një përshkallëzim të ndjeshëm të situatës, duke rrezikuar sovranitetin e Katarit, një vend kyç në negociatat e krizës Gaza-Izrael.
