Ngjarja e rëndë në fshatin Munellë të Pukës ka lënë të traumatizuar fermerin Erjon Nikolli, i cili u qëllua me armë pranë shtëpisë së tij. Në një intervistë për News24, Nikolli ka përshkruar frikën që ka kapluar familjen e tij, e cila përfshin gruan, kunatën dhe fëmijët, të gjithë të pranishëm gjatë incidentit. “Dje u zgjuam me krisma armësh. Jemi të traumatizuar dhe nuk mund ta besojmë se diçka e tillë mund të ndodhë,” ka thënë ai.
Nikolli, që merret me blegtori, ka theksuar se konflikti i vetëm që ka pasur ishte verbal me një bashkëfshatar. Ai ka bërë thirrje për ndihmën e institucioneve, duke kërkuar zgjidhje për t’u rikthyer në një jetë normale. “Kam investuar në bagëti për të siguruar të ardhmen e familjes. Nuk kërkoj gjë tjetër veçse të punoj dhe të jetoj i qetë,” ka deklaruar ai.
Gjendja emocionale është po ashtu e rënduar për bashkëshorten e tij, e cila është në muajin e nëntë të shtatzënisë. Ajo ka shprehur shqetësimin e saj duke thënë: “Jam e traumatizuar. Duhen të merren masa për sigurinë tonë.”
Policia ka nisur hetimet dhe ka gjetur gëzhoja si edhe një mesazh kërcënues të shkruar në një gur, ku thuhej “Ik se do të vdesësh.” Deri më tani, nuk ka pasur persona të ndaluar lidhur me këtë ngjarje të trishtueshme.
