Newcastle United planifikon rikthimin e interesit për portierin e Manchester City, James Trafford, i cili shpreh dëshirën për t’u larguar nga “Etihad”. Trafford, 23 vjeç, iu bashkua City-t në korrik për 27 milionë paund nga Burnley, duke u parakaluar në garë nga Newcastle. Fillimisht, ai u bë zgjedhja e parë si portier, duke nisur tre ndeshjet e para të sezonit në Premier League.
Megjithatë, situata ndryshoi drastikisht kur Pep Guardiola nënshkroi me Gianluigi Donnarumman nga PSG, duke e detyruar Trafford të ulet në pankinë. Deri tani, ai ka zhvilluar vetëm gjashtë ndeshje me City-n, duke përfshirë humbjen 2-0 ndaj Bayer Leverkusen në Champions League. Sipas raportimeve nga The Mail, Trafford po shqyrton mundësinë e një largimi para merkatos së janarit.
Newcastle pritet të bëjë një ofertë për të muajin e ardhshëm, pasi verën e shkuar u desh të sillte në huazim Aaron Ramsdale. Kërkimi për një portier afatgjatë vazhdon, dhe Trafford shihet si profil ideal për rolin. Situata bëhet më e ndërlikuar për Trafford për shkak të një paralajmërimi nga trajneri i Anglisë, Thomas Tuchel, i cili nënvizoi se për Botërorin e verës së ardhshme do të thirren vetëm lojtarë që luajnë rregullisht. Trafford kërkon mundësi për të rivalizuar Jordan Pickfordin për vendin e titullarit, duke nevojitur minutazh të garantuar.
Dhe nga ana tjetër, Manchester City mund të përballet me largimin e portierit të katërt, Stefan Ortega, i cili nuk është duke udhëtuar me skuadrën në transfertë dhe renditet pas Marcus Bettinellit në hierarki. Kjo situatë mund ta detyrojë Guardiola-n të kërkojë një tjetër portier gjatë merkatos së dimrit.
Pas gjashtë viteve në akademinë e City-t dhe huazimeve te Accrington Stanley dhe Bolton, Trafford duket se është në prag të një aventure të re, me Newcastle që është gati të shfrytëzojë këtë mundësi.
