TIRANË- Aktori i humorit i shpallur dhe investitor strategjik, Gazmend Paja është paraqitur mëngjesin e sotëm në ambientet e Prokurorisë së Posaçme.Qëndrimi i tij në SPAK nuk ka zgjatur shumë, ndërsa pas daljes ka treguar se i kanë marrë telefonin.
“Hera e dytë në SPAK, ishe si aktor apo si investitor strategjik?”, e pyetën gazetarët pas daljes nga SPAK.
Ai iu përgjigj shkurtimisht me nota humori: “Jo, isha me prokurorin në kafe, pa dashje mori celularin tim dhe solli të tijin dhe mori timin. Nuk e njoh prokurorin”.
Nuk dihet ende arsyeja e thirrjes së tij në SPAK, por sipas raportimeve se Paja ka qenë i pranishëm edhe dy ditë më parë në ambientet e Prokurorisë.
Aktori i njohur i humorit është shpallur investitor strategjik, ku në bregdetin e jugut dhe kompania e tij “Ecotech Energy Services” së bashku me kompaninë “Startek” kanë marrë 133 mijë m2 tokë në Dhërmi. PD ka deklaruar se Paja ka përfituar statusin e investitorit strategjik për të ndërtuar një resort. Vetë aktori ka pohuar se ka marrë statutin e investitorit strategjik, por theksoi se nuk ka përfituar asnjë cm2 tokë nga shteti. Berisha e ka cilësuar shpalljen e tij si investitor strategjik si një vjedhje e radhës e kryeministrit Edi Rama në bashkëpunim me aktorin.
