Trishtim i thellë ka përfshirë botën arabe pas ndarjes nga jeta të princit saudit Al-Ualid bin Khaled bin Talal, i njohur nga mediat ndërkombëtare si “Princi i Fjetur”.
Ai ndërroi jetë të shtunën në moshën 36-vjeçare, pas një periudhe dramatike prej më shumë se dy dekadash në koma.
Princi i ri saudit u përfshi në një aksident të rëndë rrugor në Mbretërinë e Bashkuar në vitin 2005, ku kishte shkuar për të ndjekur studimet në një akademi ushtarake.
Aksidenti i shkaktoi dëmtime të rënda në kokë, duke e lënë në një gjendje të pandërgjegjshme që prej moshës 15-vjeçare.
Pas aksidentit, Al-Ualid u transferua në Spitalin Mjekësor King Abdulaziz në Riad, ku u trajtua për 21 vjet nga ekipe mjekësore të specializuara. Pranë tij qëndruan gjithmonë prindërit e përkushtuar, princi Khaled bin Talal Al Saud dhe princesha Rima, të cilët nuk humbën kurrë shpresën për një mrekulli.
Në deklaratat e saj të mëparshme, princesha Rima shprehej se “shpirti i djalit të saj ishte ende i pranishëm”, ndërsa i ati, princi Khaled, refuzoi kategorikisht të lejonte shkëputjen e tij nga aparatet që e mbanin gjallë. “Fuqia Hyjnore që e mbajti gjallë mund edhe ta shërojë një ditë”, kishte thënë ai.
Për më shumë se dy dekada, princi mbijetoi me ndihmën e aparaturave për frymëmarrje dhe u ushqye përmes një tubi.
Shpresa për një rikuperim të mundshëm u ringjall në vitin 2019, kur ai reagoi me disa lëvizje të lehta, si ngritja e një gishti apo lëvizja e kokës, por fatkeqësisht, nuk doli kurrë nga koma.
Më 18 prill të këtij viti, ditëlindja e tij e 36-të, që do të ishte edhe e fundit, u shoqërua me një valë urimesh, lutjesh dhe mesazhesh shprese nga miliona ndjekës në rrjetet sociale, që e konsideronin princin një simbol të besimit dhe durimit të palëkundur, sipas Roya News.
Në të njëjtën ditë, nëna e tij, princesha Rima bin Talal, publikoi disa fotografi të të birit në platformën X, shoqëruar me fjalët prekëse.
“I dashuri im Al-Ualid bin Khaled, 21 vite pas (aksidentit) je ende i pranishëm në zemrat tona dhe në lutjet e të gjithë atyre që të duan. O Zot, shëroje robin Tënd Al-Ualid. Askush nuk e njeh dobësinë e tij përveç Teje, O Zot i qiejve dhe i tokës”, shkroi ajo.
حبيبي الوليد بن خالد واحد وعشرون عامًا وأنت دائمًا حاضر في قلوبنا ، وفي قلوب أحبابك بدعواتنا . اللهم اشفِ عبدك الوليد ؛ فلا يعلم بضعفه إلَّا أنت يارب السماوات والأرض. pic.twitter.com/Axps4tQfXa
— ريما بنت طلال (@Rima_Talal) April 18, 2025
