Mëngjesin e sotëm, rreth orës 02:40, në Spitalin Rajonal Vlorë, është paraqitur i plagosur në këmbë me armë zjarri shtetasi O. A., 36 vjeç, banues në Vlorë, i cili ndodhet jashtë rrezikut për jetën.
Hetimet e shpejta nga Seksioni për Hetimin e Krimeve në Komisariatin e Policisë Vlorë, si dhe analiza e pamjeve nga kamerat e sigurisë, zbuluan se ngjarja ndodhi në lagjen “Hajro Çakërri”, në vendin e quajtur “shkallët e varrezave të dëshmorëve”. Sipas informacioneve, O. A. ka qenë vetëplagosur aksidentalisht me armë zjarri të llojit pistoletë.
Në momentin e ngjarjes ka qenë i pranishëm dhe shoku i tij, G. M., 42 vjeç, gjithashtu banues në Vlorë. Pas incidentit, ai ka tentuar të fshehë armën dhe së bashku me O. A., nuk kanë raportuar për ngjarjen.
Për rezultatin e hetimeve, janë arrestuar në flagrancë të dy shtetasit. Olsi Alisinana është akuzuar për “Armëmbajtja pa leje”, ndërsa Gerti Meto për “Armëmbajtja pa leje”, “Moskallëzim i krimit” dhe “Veprime që pengojnë zbulimin e së vërtetës”.
Aktualisht po punohet për gjetjen dhe sekuestrimin e armës së zjarrit të përdorur gjatë incidentit. Materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.
