Detaje të reja kanë dalë në dritë nga ngjarja që ndodhi disa ditë më parë në Tiranë, ku një efektiv policie plagosi me armë zjarri një trafikant droge i cili ishte duke transportuar 1 kg kokainë.
Lidhur me ngjarjen u vunë në pranga Eneo Sulejmanaj, Kryetar i Shoqatës së Transportit Ndërqytetës, efektivi i Operacionales, Ervis Shkurta, si dhe dy shtetasit Igli Begaj e Shkëlqim Ostreni.
Sakaq ditën e sotme AMP njofton se nga hetimet është zbuluar një Call Center në Tiranë, që mashtronte kryesisht italianët për investime në bursën Forex, në pronësi të shtetasit Shkëlqim Ostreni, dhe një personi tjetër të shpallur në kërkim.
“Agjencia e Mbikëqyrjes Policore (Rajoni Tiranë) ka vijuar hetimet e thelluara mbi personat e përfshirë në ngjarjen e datës 21.03.2024, ku u ndalua një punonjës policie dhe u arrestuan në flagrancë 3 shtetas të tjerë dhe pas këqyrjes së detajuar të komunikimeve telefonike mes tyre dhe personave të tjerë, deklarimeve të disa personave që tregojnë rrethana të hetimit, si dhe këqyrjes së pamjeve filmike të administruara, është bërë e mundur gjetja dhe kontrolli i një ambienti të përshtatur si Call Center, në pronësi të shtetasve M.H. (i shpallur në kërkim) dhe SH. O., i ndodhur në rrugën “Idriz Guri” Tiranë, në të cilin ushtrohej aktiviteti i paligjshëm i mashtrimit me bursën FOREX”,- thuhet në njoftimin e AMP.
Raportohet se përmes këtij “Call centeri”, operatorët mashtronin shtetasit italianë duke përfituar shuma të konsiderueshme parash duke filluar nga 500 deri në 30 mijë euro personi.
“Gjatë kontrollit në këtë ambient, u sekuestruan në cilësinë e provës materiale, dokumenta, pajisje të ndryshme dhe njësi kompjuterike, në të cilat ishin të instaluara programe, aplikacione dhe lista emrash me numra italianë, të cilët kontaktoheshin nga operatorët, duke i mashtruar për investime në bursë, nëpërmjet të cilave arrinin të përfitonin vlera monetare të konsiderueshme, që variojnë nga 500 deri në 30 mijë euro për person”,- thuhet në njoftimin e AMP.
Në përfundim AMP njofton se materialet i janë dërguar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme ndaj Ostrenit dhe bashkëpunëtorit të tij, të shpallur në kërkim.
“Mbi bazën e materialeve hetimore të administruara deri në këtë fazë i është relatuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, caktimi i masës së sigurimit personal me karakter shtrëngues, në mungesë, për shtetasit M. H., 33 vjeç, i dyshuar për veprën penale “Mashtrim kompjuterik” i kryer në bashkëpunim, si dhe regjistrimin e të njëjtës vepër për personin nën hetim SH. O., i arrestuar më parë si i dyshuar për veprën penale “Prodhim dhe shitje narkotikësh””,- përfundon njoftimi i AMP.
Hetimet vijojnë për identifikimin e plotë të të gjithë personave të perfshirë në këtë veprimtari dhe dokumentimin me prova ligjore të veprave penale, ku dyshohet se ata janë të përfshirë.
