Vijojnë hetimet për vdekjen e 65-vjeçarit Gjergj Tusha, i gjetur pa jetë në Tale të Lezhës. Sipas korrespondentes së Top Channel, Brixhilda Deda, dyshohet se ngjarja ka qenë aksidentale. Grupi hetimor ka zbuluar se vdekja e tij mund të jetë shkaktuar nga goditja e një demi, i cili e ka përplasur në pemë, duke i shkaktuar plagë në kofshë dhe pulpa.
Në njoftimin e policisë, thuhet se ekspertiza mjeko-ligjore është përfunduar dhe nuk janë gjetur plagë nga armë zjarri apo mjete prerëse në trupin e tij. Trupi i tij u gjet të martën pasdite në afërsi të lumit Mat, dhe sipas hetimeve fillestare, dyshohej se kishte plagë të shkaktuara nga armë.
Ngjarja ka ndodhur në fshatin Pllanë, Njësia Administrative Zejmen, duke u konfirmuar se Tusha ishte duke kullotur bagëtitë kur ndodhi incidenti. Një grup hetimor ka kryer veprime të shumta, përfshirë këqyrjen e vendit të ngjarjes dhe marrjen e deklaratave, për të sqaruar rrethanat e ngjarjes.
Analiza e kufomës ka treguar se dëmtimet në trup nuk janë shkaktuar nga armë, përkundrazi sugjerojnë një aksident. Pas përfundimit të hetimeve fillestare, materialet janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Lezhë për hetime të mëtejshme. Rasti i Gjergj Tushës po ndiqet me kujdes nga autoritetet për të zbardhur faktet dhe rrethanat e këtij incidenti tragjik.
