Prokuroria e Fierit ka zbardhur ngjarjen e vrasjes së Anesti Ramës ditën e 23 korrikut, për të cilën janë arrestuar tre persona. Në mesin e të arrestuarve është edhe vajza e tij, Emanilda Rama, e cila akuzohet si autorja e krimit, bashkëpunëtorin e saj, Çlirim Dogani, si dhe gruan e viktimës, Valbona Rama, e cila dyshohet se ka fshehur krimin.
Ngjarja ndodhi rreth orës 21:16, kur u bë një telefonatë në Sallën Operative të Fierit për ndihmë mjekësore pasi Anesti Rama ishte dëmtuar në banesën e tij në fshatin Frashër. Ambulanca gjeti të shtrirë Ramën në sallon, i veshur me kostum dhe këmishë, ndërsa personeli mjekësor e shpalli të vdekur.
Hetuesit zbuluan se trupi kishte çarje në zonën ballore dhe dëmtime të tjera. E bija dhe gruaja e viktimës deklaruan se e kishin gjetur Anestin në tualet pa shenja jete, por me gjak, përpara se të njoftonin ambulancën dhe policinë. Sipas hetimeve, ata kishin lëvizur trupin nga tualeti, duke u ndihmuar vetë për të kryer ritualet mortore dhe duke pastruar vendin e ngjarjes.
Fillimisht, Emanilda Rama u arrestua për “vrasje për shkak të marrëdhënieve familjare”, ndërsa më pas u ndalua edhe Valbona Rama për pengim të hetimit. Çlirim Dogani gjithashtu u arrestua me akuzën e vrasjes në bashkëpunim. Të tre të arrestuarit vazhdojnë të mbahen në burg nën hetim.
