EKUADOR– Missi dhe modelja ekuadoriane, Landy Parraga është ekzekutuar me breshëri plumbash mesditën e së dielës në një lokal në Quevedo në Ekuador. Ndërkohë që autoritetet ende nuk kanë informacione në lidhje me shkaqet e ekzekutimit mafioz të saj nga dy persona, mediat vendase e lidhin me njërin prej narkotrafikantëve më të mëdhenj të vendit, siç është Leandro Norero.
Ky i fundit u vra gjatë revoltës në njërin prej burgjeve të vendit në tetor të vitit të shkuar duke iu prerë koka. Ai ishte një ndër trafikantët më të mëdhenj në vend dhe njihej me pseudonimin “El Patron”. Mediat përfolën emrin e tij si personi që porositi vrasjen e Ergys Dashit në Ekuador dy vite më parë, ndërsa njihej edhe si financues i tre grupeve kriminale: Los Lobos, Los Tiguerones dhe Los Chones.
Ndërkohë Parraga, e cila kishte më shumë se një milion ndjekës në llogaritë e saj të mediave sociale, si dhe linjën e saj të veshjeve sportive, u bë kryefjalë dhjetorin e kaluar kur emri i saj u përmend në një bisedë midis “El Patron” dhe llogaritarit të tij, Helive Angulo.
Gjatë gjyqit të Angulo-s, prokurorët zbuluan se Norero i ishte lutur Angulos në një mesazh të vitit 2022 për të ndihmuar në mbajtjen e lidhjes së tij me mbretëreshën e bukurisë të fshehur pasi llogaritari tha se policia e kishte pyetur për marrëdhënien e tyre. Edhe pse financat e Parraga ishin nën hetim nga Zyra e Prokurorit të Përgjithshëm, ajo nuk u ndoq kurrë penalisht për një krim dhe nuk kishte bërë kurrë ndonjë koment publik për rastin ose lidhjen e saj me Norero dhe organizatën e tij.
Si u ekzekutua Ergys Dashi?
Ergys Dashi, po darkonte mbrëmjen e 23 janarit 2022 në një nga restorantet e zonave më të njohura rezidenciale të Guajakilit në momentin që u ekzekutua. 34-vjeçari, nga Durrësi, por që prej vitesh jetonte midis Italisë dhe Hollandës, kishte vetëm pak ditë që kishte mbërritur në Guajakil. Ishte ora 19:00 e mbrëmjes, ku ndërsa Dashi vazhdonte i qetë të darkonte në restorantin ‘Grilling’ në rrugën Jose Joaquin Orrantia (Hoze Hoakuin Orrantia), përballë qendrës tregtare ‘Mall del Sol’, dy burra shtatshkurtër u shfaqën të maskuar në derën kryesore të restorantit. Pavarësisht insistimit të rojeve të sigurisë, të cilët u kërkuan certifikatën e vaksinimit, dy burrat një prej të cilëve mbante një buqetë me lule në duar, nën kërcënimin e armëve, mundën të futen në restorant dhe të afrohen në vendin ku qëndronte Ergys Dashi. Këtë të fundit e qëlluan për vdekje me 20 plumba.
