Zhvillimi i turizmit të përbashkët mes Shqipërisë, Greqisë dhe Maqedonisë së Veriut ishte pika qendrore e takimit të parë të Forumit të Komunitetit të Prespës. Kryebashkiakët e Pustecit, Prespës dhe Resnjës u mbledhën për të diskutuar hapat konkretë drejt bashkëpunimit ndërkufitar dhe zhvillimit të qëndrueshëm në zonën e liqenit.
Pali Kolefski, kryebashkiaku i Pustecit, nënvizoi rëndësinë e bashkëpunimit për të adresuar sfidat aktuale dhe për të krijuar mundësi zhvillimi për komunitetet e rajonit. Në këtë kontekst, Georgios Stergiou, kryebashkiaku i Prespës në Greqi, theksoi rolin e bashkisë së tij brenda Bashkimit Evropian, duke shprehur synimin për të transformuar Prespën në një destinacion unik. Ai theksoi se bashkia e tij ka përgjegjësi për të mbështetur partnerët dhe për të kontribuar në arritjen e objekteve të përbashkëta.
Ndërsa, Jovan Tozievski, kryebashkiaku i Resnjës, theksoi rëndësinë e projekteve të përbashkëta për avancimin e turizmit dhe përfitimin e projekteve nga BE. Ai shprehu synimin për të lidhur historinë e zonës së Prespës dhe për ta ofruar atë si një paketë të plotë për turistët.
Takimi gjithashtu përfshiu një diskutim mbi përfshirjen e të rinjve dhe grave, duke dëshiruar që Prespa të zhvillohet si një rajon gjithëpërfshirës dhe bashkëkohor. Kjo qasje synon të rrisë angazhimin e komunitetit në zhvillimin rajonal dhe të krijojë mundësi të reja për të rinjtë dhe gratë.
Organizimi i këtij forumi reflekton një iniciativë të rëndësishme për të forcuar bashkëpunimin ndërkombëtar dhe për të nxitur zhvillimin e përbashkët në një rajon me potencial të madh turistik. Bashkëpunimi përmes projekteve të qëndrueshme dhe ndërkufitare pritet të sjellë përfitime afatgjata për të gjitha palët e angazhuara.
