Pas nënshkrimit të Ligjit për Autorizimin e Mbrojtjes Kombëtare nga presidenti amerikan Donald Trump, Ambasada e Kosovës në Uashington reagoi duke theksuar mbështetje të fortë nga Shtetet e Bashkuara për Republikën e Kosovës. Në një postim në Facebook, ambasada shpjegoi se ky ligj, i cili autorizon 901 miliardë dollarë për programet e mbrojtjes, dëshmon angazhimin e SHBA-së për sovranitetin, sigurinë dhe integrimin euro-atlantik të Kosovës.
Sipas njoftimit, akti thekson mbështetjen për dialogun Kosovë-Serbi, duke inkurajuar njohjen reciproke dhe duke kundërshtuar çdo ide për ndarje territoriale apo ndryshim kufijsh. Ambasada shprehu mirënjohje ndaj Kongresit dhe Shtëpisë së Bardhë për përfshirjen e dispozitave që përforcojnë politikën amerikane ndaj Kosovës.
Ligji për vitin fiskal 2026 parashikon shpenzime rekord për ushtrinë amerikane, me një rritje prej 8 miliardë dollarësh krahasuar me kërkesat fillestare të Trumpit. Një aspekt i rëndësishëm i këtij dokumenti është përmendja e Ballkanit Perëndimor, duke nënvizuar se reduktimi i varësisë së rajonit nga gazi dhe karburantet fosile ruse është në interesin kombëtar të SHBA-së. Po ashtu, Uashingtoni nxit mbështetje për anëtarësimin e vendeve të rajonit në Bashkimin Evropian dhe NATO.
Kjo mbështetje e vazhdueshme sugjeron një angazhim të thellë të SHBA-së për stabilitetin dhe sigurinë në Ballkan, si dhe një përkushtim për ndihmuar Kosovën në zhvillimin e saj të mëtejshëm.
