SPANJË-Diego Armando Maradona Sinagra, djali i legjendës së futbollit Diego Armando Maradona, ka bërë deklarata të forta lidhur me gjyqin që po zhvillohet në Argjentinë për vdekjen e të atit. Në një intervistë për ‘El Chiringuito’, Diego Maradona Jr. u shpreh i sigurt se ka pasur neglizhencë nga ekipi mjekësor dhe pretendon se babait të tij i kishin vjedhur paratë, shkruajnë mediat e huaja.
Maradona Jr., i cili lindi në Napoli më 20 shtator 1986 dhe ishte një yll i futbollit në plazh, iu bashkua teorisë së paraqitur nga avokati Fernando Burlando se Maradona “u vra në mënyrë djallëzore” në “shtëpinë e tmerrit” në “një plan çnjerëzor që doli i efektshëm”.
“Po ndjek nga afër gjyqin dhe është një periudhë shumë e vështirë për familjen tonë. Na presin kohë të rënda, por jemi të përgatitur. Ajo që më lëndon më shumë në këtë gjyq është se e vranë. Është kaq e qartë. Ata nuk e trajtuan siç duhet dhe nuk bënë asgjë për ta shpëtuar. Unë nuk mund ta pranoj atë që mjekët nuk bënë. Jam i sigurt se do të vërtetojmë se ka pasur neglizhencë. Nëse do ta kishin trajtuar siç duhet, ai do të ishte ende gjallë. Jam i bindur se jo vetëm që nuk u kujdesën për të, por edhe i vodhën paratë,“-tha Maradona Jr.
