Mes pasigurisë që rrethon armëpushimin e brishtë të SHBA-së me Iranin, zv/presidenti amerikan JD Vance shpreson për përparim në bisedimet e paqes në Islamabad, me qëllim mbylljen e një lufte që ka sjellë rritje drastike të çmimeve globale të naftës. Sidoqoftë, analistët e tregut paralajmërojnë se, edhe në rast të një rezultati pozitiv nga negociatat, stabilizimi i tregjeve nuk do të ndodhë menjëherë. Shumica e ekspertëve presin që çmimet të mbeten të larta për një periudhë të gjatë, duke rritur kostot në pikat e karburantit dhe në të gjithë ekonominë.
Problemi ka filluar me ndërprerjen e furnizimeve me naftë gjatë muajit të fundit. Edhe nëse bisedimet çojnë në një marrëveshje paqeje dhe rihapjen e ngushticës së Hormuzit, mund të duhen muaj që furnizimet globale të naftës të kthehen në nivelet e mëparshme. Madje, ndodhin gjithmonë vonesa në uljen e çmimeve, edhe nëse furnizimet kthehen më shpejt se pritej. Ekonomisti Pavel Molchanov thekson se rritja e çmimeve të naftës mund të shkaktojë rritje të menjëhershme të çmimeve në pikat e karburantit, ndërsa ulja e tyre zakonisht kërkon javë për t’u reflektuar.
Për më tepër, përpjekjet për transportimin e naftës përmes Ngushticës së Hormuzit janë hasur në pengesa të mëdha. Sulmet iraniane ndaj tubacionit kryesor të Arabisë Saudite, që transporton naftë nga bregu lindor në portet e Detit të Kuq, kanë ulur kapacitetin e tij me 10%.
