Drafti i Kodit të ri Penal propozon dënime të ashpra për braktisjen dhe keqtrajtimin e kafshëve, duke parashikuar burgim deri në 3 vite. Neni 944 e konsideron braktisjen e një kafshe si vepër penale, veçanërisht kur kjo ndodh në kushte që rrezikojnë jetën e kafshës. Po ashtu, neni 943 përcakton dënime për shkaktimin e dëmtimeve tek kafshët shtëpiake, duke përfshirë çdo formë trajtimi të dhunshëm që kërkon ndihmën veterinare.
Pronari i kafshëve që nuk ka kontrolle të mjaftueshme mund të përballet me gjobë ose deri në 6 muaj burg, në rast se kafsha e tij shkakton dëme të lehta. Dënime të tjera parashikohen për organizimin e ndeshjeve ndërmjet kafshëve, me neni 946 që ndëshkon me gjobë ose deri në 3 muaj burg ata që promovojnë ose organizojnë këto aktivitete.
Veprimet e egra, mizore ose për qëllime fitimi ndaj kafshëve ndëshkohen me një rritje prej 50% të dënimit, sipas nenit 947. Po ashtu, ndëshkimi rritet edhe kur veprat kryhen në ngjarje publike ose kur përmbajtja shpërndahet përmes teknologjive të informacionit.
Ky projektligj synon të forcojë mbrojtjen e kafshëve duke vendosur masa të ashpra ligjore për ata që i keqtrajtojnë ose i braktisin, në një përpjekje për të krijuar një mjedis më të sigurt dhe human për këto krijesa. Kjo iniciativë është një hap i rëndësishëm drejt rritjes së ndërgjegjësimit shoqëror rreth trajtimit të kafshëve.
