Policia e Malësisë së Madhe ka zbuluar tri ambiente të përshtatura për kultivimin dhe tharjen e bimëve narkotike kanabis, në kuadër të operacionit të koduar “Neonët”. Kontrolli u realizua në fshatin Hot, ku dy banesat dhe një stallë ishin të pajisur me llamba, aspiratorë dhe panele neoni, që shërbenin për rritjen artificiale të bimëve narkotike.
Gjatë operacionit, policia arrestoi Lazer Pepajn, 69 vjeç, dhe Sander Pepajn, 48 vjeç, të dy banues në Lulashpepaj, dhe shpalli në kërkim Kristjan Pepajn, 33 vjeç. Në kuadër të hetimeve, u ndaluan gjithashtu katër punonjës të OSHEE-së, të dyshuar për “Shpërdorim detyre” për lejet e lidhjeve të paligjshme të energjisë elektrike në ambientet e kultivimit. Emrat e të ndaluarve janë Gëzim Hoxha, 57 vjeç, Lodovik Vulaj, 34 vjeç, Xhuljano Çeraj, 24 vjeç dhe Adil Selmanaj, 57 vjeç, të gjithë nga fshatra të ndryshëm të zonës.
Në përfundim të kontrollit, policia sekuestroi 1110 bimë kanabis, 1.8 kilogramë lëndë narkotike në proces tharjeje, si dhe materiale të tjera të nevojshme për kultivim, përfshirë 300 llampa, 22 aspiratorë, 35 ventilatorë, 11 panele neoni, 22 filtra ajri dhe 217 inverterë.
Policia ka njoftuar se hetimet vazhdojnë për kapjen e Kristjan Pepajt, ndërsa materialet hetimore janë referuar Prokurorisë së Shkodrës për veprat penale si “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike ose impulseve telefonike”. Operacioni tregon angazhimin e policisë për të luftuar kultivimin dhe shpërndarjen e drogës në këtë rajon.
