Futbolli bullgar ndjeu një humbje të madhe me ndarjen nga jeta të Dimitar Penev, trajnerit që dërgoi kombëtaren në gjysmëfinalet e Botërorit të vitit 1994 në SHBA. Ai ndërroi jetë në moshën 80 vjeçare pas një beteje të gjatë me sëmundjen.
Federata Bullgare e Futbollit konfirmoi lajmin e hidhur mëngjesin e kësaj të shtune. Penev njihet si një nga figurat më të njohura në historinë e futbollit bullgar. Supriza më e madhe e karrierës së tij ishte vendi i katërt i kombëtares në Botërorin e 1994, një arritje e cila shënoi një moment kulmor për futbollin e vendit.
Si futbollist, Dimitar Penev ka pasur një karrierë të shquar, duke luajtur 364 ndeshje me CSKA e Sofjes dhe duke shënuar 25 gola. Ai konsiderohet si një nga mbrojtësit më të mirë në historinë e futbollit bullgar, duke kontribuar gjithashtu me 90 ndeshje për kombëtaren, ku mori pjesë në tre edicione të Kupës së Botës.
Penev do të mbahet mend jo vetëm për arritjet e tij si lojtar, por edhe për aftësitë e tij strategjike si trajner. Ai la një trashëgimi të rëndësishme për futbollin bullgar dhe do të mungojë shumë në ambientin e futbollit vendas.
