Arrestohet pronari i firmës private të mermerit në Maqellarë të Dibrës ku një ditë më parë ndërroi jetë punëtori 35-vjeçar Bedri Markja. Atë e zuri pllaka e mermerit dhe vdiq në spital. Pronari i firmës Urim Bulku është arrestuar sot për shkelje të rregullave të sigurisë në punë. Prokuroria po vijon hetimet lidhur me rastin tragjik. Familja ka hapur dyert e mortit për të përcjellë 35-vjeçarin në banesën e fundit.
“Specialistët për Hetimin e Krimeve të Komisariatit të Policisë Dibër, në vijim të veprimeve hetimore të kryera në drejtimin e Prokurorisë, për këtë ngjarje të ndodhur, arrestuan në flagrancë për veprën penale “Shkelja e rregullave të mbrojtjes në punë”, shtetasin Urim Bulku, 51 vjeç, banues në Peshkopi, pronar i këtij subjekti”, njofton policia.
35-vjeçari Bedri Markja humbi jetën më 16 nëntor, pasi në rrethana ende të paqarta një pllakë e madhe mermeri ka rënë dhe e ka zënë poshtë. 35-vjeçari, baba i 6 fëmijëve, ndërroi jetë për shkak të plagëve të marra.
