Ministri i Shëndetësisë në Maqedoninë e Veriut njoftoi këtë të mërkurë se gjendja e 178 të lënduarve nga zjarri në klubin e natës në Koçan është e stabilizuar. 101 prej tyre janë duke u trajtuar jashtë vendit dhe për momentin nuk kanë rrezik për jetën.
“Pas mbledhjes së Shtabit të Krizës në mëngjes konstatuam se të gjithë pacientët janë në gjendje relativisht stabile, uroj dhe shpresoj se ngadalë të nisim disa prej tyre të lëshohen në shtëpi. Sot, tre katër pacientë do të lëshohen në shtëpi nga Qendra Klinike”, shprehet ministri i Shëndetësisë në RMV, Arben Taravari.
Taravari njoftoi se të enjten do të dorëzohen trupat e viktimave tek familjarët ndërsa qeveria do të ofrojë mbështetje për ceremonitë e varrimit.
“U kemi ofruar mbështetje”, thekson Taravari.
Ndërkohë Prokuroria i ka kërkuar Gjykatës të zgjasë edhe me 48 orë të tjera paraburgimin për 16 personat e arrestuar të akuzuar për tragjedinë, mes të cilëve është edhe ish-ministri i Ekonomisë, Kreshnik Bekteshi. Ndërsa ministri i Brendshëm Pançe Tosjkovski ka urdhëruar shkarkimin nga detyra të të gjithë shefave të policisë së komisariatit të Koçanit.
Qeveria ka nisur një verifikim të kushteve të të gjithë klubeve të natës në vend. Zëdhënësja Marija Miteva tha në një konferencë për shtyp se 3 nga 12 subjektet e verifikuara do të mbyllen për shkak të mosplotësimit të kushteve.
