Më shumë se 75 mijë euro janë mbledhur brenda dy ditësh në platformën GoFundMe për familjen Kola, e cila pësoi një tragjedi javën e kaluar në Porcari, Itali, nga helmimi me monoksid karbonit nga një kaldajë gazi. Kjo kaldajë ishte instaluar së fundmi në banesën e tyre.
Kampanja u hap nga Durim Kola, vëllai i njërit prej viktimave, Arti Kola, 48 vjeç. Fondet do të përdoren për të mbuluar shpenzimet e funeralit dhe transportin e trupave drejt Shqipërisë, ku do të zhvillohen ceremonitë mortore. Shuma e mbetur do të ndihmojë familjarët e viktimave.
Refleksioni i solidaritetit qytetar është evidentuar përmes dhjetëra donacioneve që variojnë nga 50 deri në 500 euro, duke treguar mbështetje të gjerë për familjen e prekur nga ky fatkeqësi.
Në të njëjtën kohë, Prokuroria e Luccas ka nisur hetime për zbardhjen e rrethanave të ngjarjes. Autoritetet dyshojnë se kaldaja ishte e re dhe ishte instaluar nga pronari i banesës. Po ashtu, ata presin rezultatet e analizave toksikologjike për katër viktimat, që pritet të luajnë një rol kyç në vijimin e hetimeve.
Pas përfundimit të procedurave ligjore të nevojshme, trupat e viktimave do të kthehen në Shqipëri për t’u përcjellë në banesën e fundit.
