Një ekspert i aviacionit beson se bashkëpiloti i fluturimit AI171 të Air India-s mund të ketë tërhequr gabimisht flapat e avionit në vend të marshit të uljes, duke shkaktuar kështu bllokimin dhe rrëzimin e mjetit fluturues.
Sipas ekspertit, pavarësisht se levat që kontrollojnë këto dy sisteme ndodhen në pozicione të ndryshme dhe nuk janë pranë njëra-tjetrës, është e mundur që një gabim njerëzor i tillë të ketë qenë fatal.
Kapiten Steve, pilot në një linjë ajrore komerciale dhe YouTuber që analizon aksidente ajrore dhe incidente të afërta me to, ndau teorinë e tij mbi tragjedinë që i mori jetën 241 personave.
Aeroplani Dreamliner 787, me destinacion Londrën, filloi të humbiste lartësi pak minuta pas ngritjes dhe u rrëzua mbi një zonë të banuar në Ahmedabad, Gujarat, duke shpërthyer në flakë.
Sipas Steve, gjithçka mund të ketë nisur nga një keqkuptim në kabinën e pilotit.
“Dëgjoni çfarë mendoj se ka ndodhur, dhe sërish, kjo është vetëm një teori personale,” u shpreh ai.
“Mendoj se piloti i kërkoi bashkëpilotit: ‘Tërhiq marshin e uljes.’ Por bashkëpiloti, për ndonjë arsye, kapi levën e flapeve dhe i tërhoqi ato. Nëse kjo është ajo që ndodhi, atëherë shpjegon shumë nga ajo që ndodhi më pas.”
Sipas tij, tërheqja e flapeve në atë moment do të kishte shkaktuar një humbje të menjëhershme të ngritjes dhe shpejtësisë, gjë që do ta bënte avionin shumë të vështirë për t’u kontrolluar.
Ai shtoi se në mënyrë tipike, flapat e një 787 Dreamliner përkulen për të ndihmuar ngritjen gjatë fluturimit, por në këtë rast nuk është vërejtur ndonjë kthesë karakteristike në trajektore, gjë që mund të tregojë se ato janë tërhequr gabimisht.
Nga 242 persona në bord, vetëm një mbijetoi, ndërsa 38 të tjerë humbën jetën në tokë, duke e bërë këtë një nga fatkeqësitë ajrore më të rënda të dekadës së fundit.
Shkaku zyrtar i tragjedisë ende nuk është konfirmuar, ndërsa hetuesit po shqyrtojnë të gjitha pistat, përfshirë një defekt teknik apo gabim njerëzor.
