Firence – Një ngjarje e rëndë ka ndodhur pasditen e 17 prillit në zonën e Busteccas, ku një djalë shqiptar 16-vjeçar, me inicialet A.S., u gjet i pajetë në shtratin e tij. Trupin e ka zbuluar nëna e tij rreth orës 15:30, pasi ishte kthyer nga puna dhe mendoi fillimisht se djali ishte ende në gjumë, pasi shkollat ishin mbyllur për pushimet e Pashkëve. Kur shkoi ta zgjonte, kuptoi se diçka nuk ishte në rregull.
Nëna tentoi ta zgjonte dhe njoftoi menjëherë shërbimin e urgjencës 118, por për 16-vjeçarin nuk mund të bëhej më asgjë. Mjekët konfirmuan vdekjen, e cila sipas të dhënave të para, mendohet të ketë ndodhur për shkaqe natyrale.
Në vendngjarje mbërritën edhe karabinierët, të cilët nuk konstatuan shenja dhune. Megjithatë, prokuroria ka urdhëruar autopsinë për të përcaktuar shkakun e saktë të vdekjes.
I riu ishte student në Institutin Teknik “Meucci” në Firence, fëmija më i madh i një çifti të ri shqiptar me tre fëmijë. Familja, e njohur në komunitet si punëtore dhe e përkushtuar, ishte zhvendosur në Barberino disa vite më parë.
