Një ngjarje tragjike ka ndodhur mbrëmjen e kësaj dite në ishullin Xios në Egje, sipas mediave greke. Incidenti përfshinte një motoskaf që transportonte emigrantë dhe një anije të Rojës Bregdetare. Motoskafi përpiqej të afrohej në Mersinidi, Xios, për të zbarkuar emigrantët, por u identifikua nga një anije e Rojës Bregdetare, e cila nisi një ndjekje. Gjatë ndjekjes, në përplasje ndodhën dy mjete lundruese, me pasojë lëndime të lehta për disa oficerë.
Një zyrtar nga Ministria e Transportit Detar konfirmoi se deri tani janë raportuar 14 viktima. Ai shtoi se motoskafi dyshohet të kishte në bord 30 deri në 35 emigrantë të paligjshëm. Aktualisht, një operacion kërkim-shpëtimi po zhvillohet në zonën përreth, për të gjetur dhe ndihmuar të mbijetuarit.
Sipas Shërbimit Mjekësor të Emergjencës, ekipet e shpëtimit kanë transportuar në spital 18 emigrantë të parregullt, përfshirë një grua shtatzënë, si dhe dy oficerë të Rojës Bregdetare. Disa nga viktimat mendohet se janë qëlluar me armë, ndërsa të tjerët kanë humbur jetën si pasojë e përplasjes.
Prokuroria është nisur në vendngjarje për të mbledhur provat, ndërsa helikopterë dhe motoskafe të Rojës Bregdetare janë angazhuar për të kërkuar të tjerë të plagosur ose të vrarë në këtë incident të rëndë. Situata është ende dinamike dhe detajet e tjera priten të dalin në dritë ndërsa hetimet vazhdojnë.
