TIRANË– Një nga kompanitë që kanë ndenjur në hije është kompania e kontenierëve që është marrë me ngarkesat që supozoheshin të shkonin në Tajlandë. Kur janë nisur në fillim të korrikut nga Porti i Durrësit, këto ngarkesa janë shkarkuar në Portin e Triestes dhe janë ngarkuar te anijet e nënkontraktuara nga MAERSK nëpërmjet kontenierëve që i përkisnin kompanisë italo-zviceriane “MSC Mediterranean Shipping Company SA.”
Roli i Portit të Triestes dhe administratës italiane, e cila është anëtare e Bashkimit Europian i ka shpëtuar doganave, ku është bërë shkarkimi dhe ngarkimi përsëri i kontenierëve. “Vetting” kontaktoi Drejtorin në Portin e Triestes, Antonio Cantani, për ngarkesën e rrezikshme nga Porti i Durrësit, por drejtuesi italian ishte i paarritshëm në linjë telefonike.
Ahmet Mehmeti ekspert mjedisi shprehet se “kjo historia me mbetjet është përsëritur edhe në vendet fqinje me Shqipërinë, në Itali e në vende të tjera. Pra, kanë spekulluar me mbetjet dhe italianët janë një shembull. Janë një përvojë që ne të mos e përsërisim atë gjë”.
Ajo që e bën më komplekse situatën është fakti se në shumicën e medias është raportuar për 100 kontenierë. Madje në komunikatën me përfaqësuesit e opozitës shqiptare, Partisë Demokratike, Autoriteti Portual i Durrësit ka deklaruar se nuk ka informacion për 100 kontenierët.
Në fakt janë 102 kontenierë që janë ngarkuar nëpërmjet dy anijeve “MAERSK”, të cilat kanë patur kontenierët 40+1 dhe 60+1. Sipas Jim Puckett, ngarkesa të tjera mund të kenë ardhur nga Europa Lindore nëpërmjet kamionave drejt e në Portin e Durrësit, duke dhënë shpjegime nëse te kontenierët mund të ketë mbetje radioaktive.
Drejtori ekzekutiv i BAN, Jim Puckett u shpreh “Kjo nuk do të thotë se ky material nuk mund të jetë radioaktiv, disa nga kontenierët apo të gjithë, thjesht nuk kemi prova për këtë. Mendoj se ka shumë mundësi që ky lloj materiali të jetë mbetje toksike dhe sipas ligjit ndërkombëtar nuk duhet të ishte larguar kurrë nga porti i Shqipërisë, pa pëlqimin e të gjitha vendeve të përfshira, veçanërisht pëlqimin dhe lejen e shtetit të Tajlandës. Tajlanda është shprehur se ata kurrë nuk kanë dhënë leje që kjo ngarkesë të vinte në vendin e tyre”.
Të njëjtin shqetësim me drejtorin e BAN Basel ndan dhe kryetari i shoqatës ekologjike në Elbasan. Sipas ekpertit mjedisit Ahmet Ahmeti “Ato mund të jenë grumbulluar në të gjithë Europën, në Itali ose në ndonjë vend tjetër, se kështu të lësh të mendosh vetë fakti, vet kjo nebulosë e njoftimeve që vinë nga të katra anët e botës. QË ATJE hyn derri e dosa, dmth edhe nuk dihet ku janë. S’janë ato vetëm të KURUMIT, ose rrezik smund të ketë pjesë as KURUMI mqs ka cuar herë pas here, del për këto. Nuk dihet, nuk ka informacion sepse ne nuk bëjmë punën tonë, Autoriteti Portual e ka detyrë, bën vaki e ka marrë koncesionari?”
Por kush është MSC dhe cila është historia me rajonin e Ballkanit?
MSC është në pronësi të Gianluigi Ponte. Në fillim të vitit 2019, autoritetet doganore të Shteteve të Bashkuara të Amerikës do të bllokonin anijen “GAYANE” në pronësi të MSC-së, pasi do të zbulonin në brendësi të saj sasinë më të madhe të kokainës të trafikuar në SHBA prej rreth 20 tonësh me vlerë 1 miliardë dollarë.
Nga investigimet rezultonte se më shumë se 1/3 e stafit të MSC-së kishte ndihmuar në transportin e kokainës te motorskafet e vogla dhe kjo nuk ishte hera e parë. Brenda 6 mujorit të parë, autoritetet amerikane sekuestruan 3 ngarkesa të ndryshme kokaine nga Kolumbia për të njëjtin grup kriminal nga Mali i Zi dhe të treja anijet kanë qenë në pronësi MSC-së, “MSC Charlotta” në Neë York, MSC Desiree dhe MSC Gayene në Portin e Filadelfias.
Për të zbuluar më tepër, “Vetting” kontaktoi administratorin e degës së MSC Albania, Mediterranean Shipping Company Albania, Artur Paço i cili refuzoi t’ju përgjigjej pyetjeve për përmbajtjen e kontenierëve, duke na adresuar te zyrat qendrore. Të njëjtin qendrim pati edhe drejtuesi i zyrës qendrore të MSC-së për komunikimet globale, Giles Read duke shtuar më shumë pikëpyetjet për rolin e kompanisë globale në sektorin e kontenierëve.
Sipas ekpertit te mjedisit Ahmet Mehmeti “ne nuk zbatojmë rregullat dhe ligjet. Autoriteti Portual duhet të kishte zbatuar rregullat dhe ligjet, të kontrollonte kush hyn e kush del brenda kufirit shqiptar. Të dijnë cfarë futet, si mund të vijnë të na futen lëndë radioaktive e ne s’e dimë? Na futen helmet dhe mbeturinat e të gjithë botës dhe ne nuk e dimë, jemi bërë koshi i Europës…” Sipas raportit nga Agjencia Kombëtare e Mjedisit, vetëm vitin e kaluar, Shqipëria ka prodhuar 39 mijë tonë mbetjesh të rrezikshme, duke përjashtuar mbetjet e rrezikshme spitalore. Aktualisht vendi yne nuk ka impiant incenerimi per mbetje te rrezikshme dhe ligji e ndalon importin e mbetjeve të rrezikshme./ Balkanweb
