Bashkia Poliçan, nën drejtimin e Adriatik Zotkajt, ka zhvilluar një tender të dyshimtë për “dhënie në përdorim të sipërfaqeve të fondit kullosor për vendosje stacionesh dhe bazamente për panele fotovoltaike me qëllim prodhimin e energjisë” për një periudhë 10-vjeçare.
Në lojë janë mijëra metra katrorë tokë publike kullosore – pasuria nr. 931, 946/1, 930/1, 942/1, 943/1, 987/2 – që shtrihen në ngastrat 17, 122 dhe 25 të ekonomisë pyjore Mali Tërpan. Këto prona, të destinuara për blegtorinë dhe jetesën e dhjetëra familjeve, do të kalojnë në shfrytëzim privat për një dekadë të plotë.
Si ndodhi kjo?
Tenderi, me vlerë dysheme 32.696.100 lekë, u zhvillua më 6 janar 2025 dhe në garë mori pjesë vetëm një operator – kompania Delvina Solar shpk. Oferta e vetme prej 21.992.960 lekësh pa TVSH u shpall fituese.
Kjo është një “Red Flag” klasike: procedurë formalisht “me konkurim publik” por praktikisht e mbyllur, me mungesë totale konkurrence. Në këto raste, kriteret e tenderit, afatet e dorëzimit të dokumenteve dhe kushtet e pjesëmarrjes shpesh formulohen në mënyrë të tillë që të eliminojnë çdo konkurent tjetër, duke lënë në garë vetëm kompaninë e parapërzgjedhur.
Pyetjet që kërkojnë përgjigje
- Pse Bashkia Poliçan nuk arriti të tërhiqte asnjë ofertë tjetër? A u vendosën kritere “të qepura” për një kompani të vetme?
- Çfarë lidhjesh ka administrata e Adriatik Zotkajt me Delvina Solar shpk?
- Pse nuk u bë një analizë reale e impaktit social dhe ekonomik për komunitetin para se tokat kullosore t’i jepeshin privatit për 10 vjet?
- A janë informuar banorët e zonës që këto pasuri publike do të humbasin funksionin e tyre si kullota për blegtorinë?
- Ku është SPAK-u? A do të hetojë ky institucion një procedurë që përmbush të gjitha elementet e një tenderi klientelist?
- A ka vend për hetim mbi mundësinë e konfliktit të interesit ose korrupsionit aktiv/pasiv nga zyrtarë të Bashkisë Poliçan?
Ky tender nuk është një kontratë e zakonshme. Ai është një test i qartë për transparencën, ndershmërinë dhe integritetin e qeverisjes vendore. Kur prona publike jepet në shfrytëzim privat për një dekadë, pa garë reale dhe pa përfshirjen e komunitetit, kemi të bëjmë me një akt që rrezikon jo vetëm pasurinë publike, por edhe besimin e qytetarëve te institucionet.
Nëse SPAK-u dhe institucionet e tjera të drejtësisë nuk reagojnë, ky rast do të mbetet një shembull i radhës se si tokat, kullotat dhe pasuritë e përbashkëta kthehen në “plaçkë” për interesat e ngushta të një grushti njerëzish pranë pushtetit lokal.
Ish-drejtori i Alpetrolit, Endri Puka ka në pronësi direkte dhe indirekte një mori firmash. Edhe pronësia e kompanisë “DELVINA SOLAR”, e cila është edhe fituesja e ankandit në Poliçan, ka lëvizur nga ‘koka’, Endri Puka, tek disa shtetas bullgarë dhe maqedonas. Por gjurma është lënë pas, pasi administratore e kompanisë ka qenë edhe Ela Puka, bashkëshortja e ish-drejtorit. Tashmë këtë “detyrë” e ka marrë Anchev Ivan Ventzeslavov.
Edhe pse kompania është krijuar në vitin 2022 dhe nuk ka pasur përvojë të mëparshme në fushën e energjisë së blertë, sërish ka dalë fituese. “Ndihmë” i ka dhënë edhe ofera, pasi “DELVINA SOLAR” vendosi në tavolinë një shumë me vlerë 21.992.960 lekë/vit, nga fondi limit prej 32.696.100 që kishte vendosur Bashkia. Dhe për çudi, në garë nuk mori pjesë askush tjetër.
