Trabzonspor ka filluar herët planifikimet për transferimet e sezonit të ri, duke zbatuar kërkesat e trajnerit Fatih Tekke. Klubi ka vendosur të blejë të drejtat e përhershme të sulmuesit shqiptar Ernest Muçi, i cili u huazua nga Beshiktashi në fillim të sezonit.
Aktualisht, Trabzonspori është 10 pikë prapa Galatasarajit dhe 7 pikë prapa Fenerbahçes në klasifikim. Për të ndërtuar një skuadër të fortë dhe konkurruese për sezonin e ardhshëm, drejtuesit e klubit e shohin Muçin si një lëvizje të rëndësishme. Pas një analize të detajuar nga trajneri, ata kanë përfunduar se 24-vjeçari duhet të mbetet në ekip. Muçi ka spikatur me performancën e tij, duke përmbushur pritjet e stafit teknik.
Klubi planifikon të finalize transferimin duke paguar këstin e parë para përfundimit të sezonit, për të shmangur pasigurinë lidhur me të ardhmen e lojtarit. Sipas marrëveshjes, 1 milion eurot e paguara për huazimin do të zbriten nga shuma totale e blerjes prej 8.5 milion eurosh. Pjesa e mbetur prej 7.5 milion eurosh do të paguhet në 5 këste të barabarta.
Me pagesën e këstit të parë prej 1.5 milion eurosh, Trabzonspor do të fitojë të drejtat e transferimit të Muçit. Drejtuesit kanë përgatitur një plan financiar në përputhje me rrethanat. Gjatë këtij sezoni, Muçi ka luajtur në 23 ndeshje dhe ka kontribuar me 13 gola dhe 5 asiste, duke u bërë një nga lojtarët më produktivë të ekipit.
Trabzonspor e sheh transferimin e Muçit si lëvizjen e parë për sezonin 2026-2027, duke synuar të vendosë një themel të fortë për planifikimin e sezonit të ri. Klubi pret që kjo marrëveshje të finalizohet para përfundimit të sezonit, për të filluar sezonin e ardhshëm me një strategji të qartë dhe objektiva ambicioze.
