Tifozët e Manchester United po planifikojnë një protestë të madhe ndaj pronarëve të klubit, familjes Glazer dhe Sir Jim Ratcliffe. Grupi “The 1958” ka njoftuar marshimin e tyre para ndeshjes ndaj Fulhamit, më 1 shkurt, pjesë e javës së 24-të të Premier League. Ky veprim vjen pas vitit 2024, kur Ratcliffe u bë bashkëpronar i klubit, por nuk ka sjellë qetësim, përkundrazi, kritikat janë rritur.
Protestuesit do ta drejtojnë vëmendjen edhe ndaj Ratcliffe, të cilin e akuzojnë se është rreshtuar me familjen Glazer dhe se po ndihmon të vazhdojnë në pushtet. Organizatoret presin pjesëmarrje më të madhe sesa protesta e kaluar në maj, kur pesë deri në gjashtë mijë tifozë u grumbulluan përpara ndeshjes me Arsenalin, protestë që u vlerësua si më e madhja ndaj pronësisë së klubit.
Një zëdhënës i grupit theksoi se 21 vite me borxhe dhe keqmenaxhim financiar janë shumë. Ai theksoi se tifozët nuk do të jenë bashkëpunëtorë në këtë situatë dhe e akuzoi Ratcliffe për mungesë vizioni. Sipas tij, problemi nuk qëndron te rezultatet sportive, por te modeli i pronësisë. Ai përfundoi duke thënë se situata do të mbetet e pandryshuar derisa Glazerët të largohen, duke shprehur se pakënaqësia e tifozëve është në kulmin e saj.
Protesta pritet të jetë një shprehje e fuqishme e revoltës së tifozëve ndaj mënyrës se si janë udhëhequr punët në klub, duke sinjalizuar se kërkesat për ndryshime janë më të forta se kurrë.
