Reforma e re e pagave rriti më tej pabarazinë këtë vit buxhetor. Punonjësve në shërbimet themelore të vendit, mësuesit, mjekët dhe infermierët dhe trupa policore në terren paga iu rrit vetëm 7 për qind, ndërsa funksionet e larta të qeverisëse, deputetët, ministrat dhe zv/ ministrat përfituan rritje të pagës nga 50 deri 98 për qind sipas vendimeve të fundit me reformën e pagave që po diskutohet në Kuvend.
Sipas projektligjit për “Kompetencat për caktimin e pagave” që pritet të miratohet nesër ne seancë plenare, të marrë në analizë nga revista “Monitor”, deputetët përfitojnë rritjen më të madhe me 98 për qind, duke e çuar pagën bruto me 310,250 lekë nga 156,777 lekë që është aktualisht. Pas miratimit nga Kuvendi rritja do të hyjë në fuqi që nga 1 prilli e këtij viti.
Paga e ministrave rritet me 82 për qind, duke shkuar në 310,250 lekë në muaj nga 174,760 lekë që është aktualisht. Rritje me mbi 72% pësoi edhe paga e Kryeministrit dje Kryetarit të Kuvendit, ndërsa paga më e lartë në vend ajo e Presidentit që është në krye të hierarkisë së pagave arriti me 425.000 lekë nga 257, 000 lekë, që është aktualisht me rritje 65%.
Praktikisht, rritja reale e pagave të tyre është zero për qind pasi rritja është vetëm një indeksim me inflacionin, i cili vitin e kaluar ishte 6.7%. Paga neto e një mësuesi në arsimin 9-vjeçar më përvojë 20-vjeçare dhe më të gjitha kualifikimet arriti pas rritjen e 1 prillit në 59,400 lekë nga 56,700 lekë që ishte në mars.
Gjithashtu, infermierët kishin rritje vetëm 2600 lekë në muaj. Një infermier në Qendrën Spitalore Nënë Tereza, master shkencor dhe 20 vite përvojë merr 56,600 lekë neto në muaj nga 1 prilli 2023, nga 540,000 më parë.
