Tetë objekte të çmuara, përfshirë bizhuteri dhe kurora, janë vjedhur nga muzeu i Luvrit në Paris. Vjedhja ndodhi në Sallën Apollo, ku hajdutët përdorën një plan të mirëorganizuar për të arritur brenda muzeut dhe për të marrë objekte të vlefshme brenda një kohe rekord prej vetëm 7 minutash.
Ministria Franceze e Kulturës publikoi një listë të bizhuterive të vjedhura. Këto përfshijnë diadema, gjerdanë, vathë dhe kurora me diamante dhe smeraldë, duke përfshirë një broshë me 2,634 diamante që muzeu e kishte blerë për 6.7 milionë euro. Autorët ishin katër të armatosur, dy prej të cilëve u veshën si punëtorë dhe ishin në një kamion me pirun ngritës, kurse të tjerët në skuterë.
Kamerat e sigurisë dokumentuan momentin kur njëri prej sulmuesve thyen vitrinat që mbaheshin xhevahiret e Napoleonit dhe ata të sundimtarëve francezë. Pas vjedhjes, hajdutët u arratisën me objekte të vlefshme, duke lënë pas dy skuterë dhe disa sende të tjera.
Në një zhvillim të mëtejshëm, autoritetet gjetën një nga kurorat e vjedhura, përkatësisht atë të Perandoreshës Eugenie, jashtë muzeut. Kjo kurorë përbëhet nga 1,354 diamante dhe 56 smeraldë dhe është konsideruar një shembull tipik i kurorave perandorake.
Ministri i Brendshëm Loren Nunez theksoi se hajdutët kishin një plan të menduar mirë, ndërsa Ministrja e Kulturës Rachida Dati nxitoi në vendngjarje dhe konfirmoi se nuk pati të lënduar gjatë incidentit. Luvri, muzeu më i vizituar në botë, ka rreth 30,000 vizitorë në ditë dhe pritjet e numrit të vizitorëve arrijnë në 9 milionë deri në vitin 2024, ku 80% janë turistë.
Raportimet nga mediat lokale sugjerojnë se diamanti i famshëm “Régent”, një nga objektet më të çmuara të muzeut, nuk është prekur gjatë vjedhjes. Hetimet për këtë incident të rëndë vazhdojnë ndërsa autoritetet po përpiqen të identifikojnë dhe kapin autorët e krimit.
