Një test i ri gjaku, që identifikon më shumë se 50 lloje kanceri, po përbën një avancim të rëndësishëm në diagnostikimin e hershëm të sëmundjes, sipas një studimi të fundit në Amerikën e Veriut. Testi, i quajtur Galleri dhe zhvilluar nga kompania Grail, është projektuar për të zbuluar fragmente ADN-je kancerogjene që qarkullojnë në gjak.
Rezultatet e provës klinike tregojnë se testi ka identifikuar rreth 75% të llojeve të kancerit për të cilat aktualisht nuk ekzistojnë programe të koordinuara kontrolli ose depistimi. Më shumë se gjysma e rasteve të zbuluara ishin në faza të hershme, kur trajtimi është më i efektshëm. Testi aktualisht po testohet edhe nga Shërbimi Shëndetësor Kombëtar i Britanisë.
Në një provë që përfshiu 25,000 të rritur në SHBA dhe Kanada për një vit, afërsisht 1 në 100 persona ka marrë një rezultat pozitiv, prej të cilave 62% u konfirmuan më vonë si kancer. Sipas drejtuesit të studimit, këto të dhëna sugjerojnë se testi mund të transformojë mënyrën si realizojmë kontrollet për kancerin, duke rritur shanset e zbulimit të sëmundjeve në faza ku trajtimi është më i efektshëm.
Testi gjithashtu tregon saktësi të lartë në përjashtimin e rasteve pa kancer, me rezultate negative mbi 99%. Kur përdoret në kombinim me kontrollet ekzistuese për kancerin e gjirit, zorrës së trashë dhe qafës së mitrës, numri total i kancereve të zbuluara u shtatëfishua.
Tre të katërtat e rasteve të zbuluara ishin të kancerëve pa programe depistimi, si ato të vezoreve, mëlçisë, stomakut, fshikëzës dhe pankreasit. Testi gjithashtu arriti të identifikojë me saktësi origjinën e kancerit në 90% të rasteve.
Shkencëtarët që morën pjesë në studim besojnë se këto rezultate janë shumë premtuese, duke lënë hapësirë për një rol të rëndësishëm të testit në diagnostikimin e hershëm të kancerit. Sidoqoftë, ekspertët e jashtëm paralajmërojnë se nevojiten studime të mëtejshme për të vërtetuar ndikimin e tij në uljen e vdekshmërisë nga kjo sëmundje.
