Një tërmet me magnitudë 4.1 ballë u regjistrua mbrëmjen e sotme në qytetin e Korçës, me epiqendër në Greqi, pranë zonës së Kosturit. Lëkundjet ishin të ndjeshme në zonat Hoçisht, Bilisht dhe Korçë, por deri në këtë moment nuk raportohet për dëme materiale.
Agjencia Kombëtare e Mbrojtjes Civile konfirmoi ngjarjen duke theksuar se lëkundjet sizmike u regjistruan në orën 19:50 të datës 04.02.2026. Sipas të dhënave të Institutit të Gjeoshkencave, magnituda e tërmetit arriti në 4.1, me një thellësi midis 5 dhe 15 kilometrave. Edhe pse situata po monitorohet, autoritetet nuk kanë raportuar për ndonjë dëm deri tani dhe njoftuan se çdo informacion i ri do të publikohet në vijim.
