Mbledhja e Këshillit Bashkiak të Bulqizës u zhvillua në një klimë të tensionuar, pas dështimit të seancës së parë për shkak të mungesës së kuorumit. Atmosfera u ngarkua më tej nga prezenca e banorëve të Gjoricës së Poshtme, të cilët protestuan ndaj projekteve për shfrytëzimin e tokave pyjore dhe kullosore, sidomos për ndërtimin e impianteve fotovoltaike.
Pjesëmarrësit theksuan se këto projekte paraqesin një kërcënim të drejtpërdrejtë për jetesën e tyre, duke prekur kullotat e përdorura për blegtorinë dhe duke ndikuar negativisht në bujqësi. Ata shprehën shqetësimin se humbja e këtyre sipërfaqeve do të çonte në pasoja ekonomike dhe sociale të rënda për familjet që varen nga këto burime. Banorët kërkuan gjithashtu transparencë dhe përfshirje në procesin e vendimmarrjes, duke akuzuar institucionet vendore për mungesë konsultimi paraprak.
Tensioni u rrit kur banorët refuzuan të largoheshin nga salla, duke penguar vazhdimin normal të diskutimeve. Një moment tjetër i tensionuar ishte përplasje mes anëtarëve të opozitës dhe drejtuesve të këshillit rreth kërkesës për shkarkimin e sekretarit të Këshillit Bashkiak, Klodian Reçi. Opozita akuzoi Reçin për korrupsion, tejkalim kompetencash dhe shkelje të procedurave ligjore lidhur me organizimin e dëgjesave publike për dhënien në përdorim të tokave.
Opozita kërkoi që mocioni për shkarkimin e sekretarit të hidhej në votim përpara shqyrtimit të rendit të ditës, por kjo kërkesë u refuzua nga kryetari i Këshillit Bashkiak, Arben Çupi, i cili argumentoi se çështja do të shqyrtohej në mbledhjen e ardhshme. Në reagimin e tij, Klodian Reçi mohoi akuzat e opozitës dhe theksoi se banorët kishin shprehur kundërshtime në dëgjesat e organizuara, duke shtuar se nuk ishte mbledhur asnjë dokument që të vërtetonte dakordësinë e komunitetit për projektet e planifikuara.
