Të shtëna me armë zjarri ndodhën në orët e para të mëngjesit në qendër të Karakasit, duke shkaktuar panik dhe masa të menjëhershme sigurie pranë pallatit presidencial, Palacio Miraflores. Sipas raportimeve, të shtënat përfshinin armë automatike dhe mitraloza kundërajrorë, u përqendruan në zonën e pallatit ku Delcy Rodríguez mori detyrën si presidente në detyrë, pas kapjes së Nicolás Maduro gjatë një operacioni ajror amerikan.
Video të publikuara në rrjetet sociale tregojnë kolona automjetesh ushtarake dhe të blinduara, ku grupet e armatosura po përparonin në formacion luftarak, ndërsa motoçiklistët e armatosur u shfaqën gjithashtu në pamje. Plumbat goditën dritaret e disa pallateve, duke treguar intensitetin e situatës. Të shtënat filluan rreth orës 01:30 sipas kohës italiane dhe vazhduan për më shumë se gjysmë ore, derisa autoritetet deklaruan se “situata është nën kontroll”.
Raportet sugjerojnë se incidenti mund të ketë nisur pasi dy dronë u panë duke fluturuar mbi pallatin presidencial, çka rriti frikën për një mundësinë e një ndërhyrjeje të re amerikane. Ky zhvillim dyshohet se ka shkaktuar reagimin e forcave të sigurisë dhe aktivizimin e armëve kundërajrore. Pas ngjarjes, ndërtesat qeveritare në qendër të Karakasit u evakuuan dhe mbyllja e ministrive dhe institucioneve shtetërore u raportua nga transmetuesi kolumbian Caracol.
Situata ka shkaktuar izolimin e bizneseve dhe lagjeve përreth, duke lënë qytetarë dhe klientë të bllokuar brenda, ndërsa autoritetet venezueliane nuk kanë ofruar ende një sqarim të detajuar lidhur me shkaqet e të shtënave. Atmosfera mbetet e tensionuar në kryeqytet, me qytetarët që kërkojnë më shumë siguri në një ambient kaq të paqëndrueshëm.
