Presidenti i La Ligës, Javier Tebas, ka shprehur revoltën e tij pas anullimit të zhvendosjes së ndeshjes Villarreal–Barcelona në Miami, duke e cilësuar këtë si një “çështje shteti” dhe një mundësi të humbur për futbollin spanjoll. Në një mesazh të postuar në rrjetin X, ai nënvizoi se futbolli spanjoll ka humbur një mundësi për të avancuar dhe për t’u pozicionuar më mirë në arenën globale.
Tebas e lidh vendimin për të mos zhvilluar ndeshjen në SHBA me presionin e lojtarëve, tifozëve dhe Federatës Spanjolle të Futbollit, duke vlerësuar se ky mendim reflekton një qasje të mbyllur dhe provinciale, e cila mbrohet nën pretekstin e “traditës”. Ai theksoi se institucione të tilla po shkatërrojnë ligat kombëtare, të cilat sipas tij janë “forca e vërtetë lëvizëse e industrisë europiane të futbollit”.
Kritikat e tij shtrihen edhe ndaj qeverive europiane, të cilat ai akuzon për naive dhe pasive, duke mos kuptuar rëndësinë e situatave thelbësore në futboll. Tebas bëri një kritikë të drejtpërdrejtë ndaj Real Madridit, që ishte kundër zhvendosjes së ndeshjes, duke përmendur “integritetin e garës”. Ai vuri në dukje se ky apel vjen nga ata që kanë vënë në dyshim atë integritet për shumë vite, duke ushtruar presion ndaj gjyqtarëve dhe duke ndërtuar narrativa të shtrembëruara.
Në fund, ai falënderoi Villarrealin dhe Barcelonën për përfshirjen në këtë iniciativë, duke theksuar se të dy klubet mendonin për të ardhmen e kampionatit dhe jo vetëm për interesat e tyre. Pavarësisht pengesave, ai siguroi se La Liga do të vazhdojë të punojë me përkushtim që futbolli spanjoll të mbetet konkurrues, përballë atyre që duan ta shkatërrojnë. Tebas e përfundoi duke shprehur optimizmin se, edhe pse këtë herë nuk ia kanë dalë, kanë qenë shumë afër realizimit të qëllimit të tyre.
