Një persona raportohet se ka mbetur i plagosur në zonën e “Lagunës së Patokut”, pasditen e kësaj të marte. Policia e Kurbinit ka marrë informacion për një person të plagosur me armë gjahu dhe ka shkuar në vendngjarje.
Informacionet janë të pakta, pasi të shtënat kanë ndodhur në një ishull brenda “Lagunës së Patokut” dhe atje shkohet vetëm me varkë. I plagosuri është rreth 49 vjeç dhe është dërguar me urgjencë drejt Spitalit të Traumës në Tiranë.
Dyshimet paraprake janë për një konflikt të çastit që ka degraduar deri në përdorimin e armës.
Nga ana e Policisë janë ngritur pika kontrolli e po bëhet krehja e zonës me qëllim lokalizimin dhe kapjen e autorit, pasi ky i fundit është larguar menjëherë pas plagosjes.
Kurbin / Informacion paraprak
Në Lagunën e Patokut, Kurbin, rreth orës 17:00, shtetasi B. S. 56 vjeç, banues në Milot, dyshohet që pas një konflikti të çastit për motive të dobëta, ka plagosur me çifte, shtetasin B. P. 49 vjeç, banues në Krujë, i cili është transportuar në spital për ndihmë mjekësore dhe ndodhet jashtë rrezikut për jetën.
Grupi hetimor në vendngjarje vazhdon veprimet hetimore për zbardhjen e plotë të rrethanave të ngjarjes. Janë ngritur pika kontrolli e po bëhet krehja e zonës me qëllim lokalizimin dhe kapjen e autorit.
