Policia e Vlorës ka arrestuar tre persona të dyshuar si autorë të pengmarrjes së një të riu nga Kosova. Sipas autoriteteve, ngjarja lidhet me një borxh të pashlyer, ndërsa i riu është mbajtur peng për rreth dy javë në një banesë në lagjen “Osman Haxhiu”.
Të arrestuarit pritet të paraqiten para gjykatës, ndërsa pala mbrojtëse ka depozituar dokumente që përfshijnë video dhe fotografi, ku shfaqet i riu, i cilësuar si viktimë e pengmarrjes, duke ngrënë së bashku me të arrestuarit. Mbështesin argumentin se ata ishin në marrëdhënie të njohura dhe se nuk bëhej fjalë për pengmarrje.
Mbrojtja thekson se i riu kishte ardhur në Vlorë me valixhe dhe sendet e tij personale, duke planifikuar një qëndrim të gjatë. Denoncimi për pengmarrje është bërë nga motra e tij, që jeton në Suedi. Avokatët e të arrestuarve pretendojnë se i riu kishte kërkuar para nga familjarët për të shlyer një borxh, duke e trajtuar rastin si një keqkuptim.
Sipas hetimeve, në banesën ku dyshohet se zhvilloheshin ngjarjet, është gjetur valixhja me rrobat dhe sendet personale të të rinjve, duke mbështetur pretendimin se i riu kishte shkuar aty për të qëndruar. Megjithëse videot nuk tregojnë qartë datën dhe orën e regjistrimit, ato sugjerojnë se personat duken të njohur dhe komunikojnë lirshëm.
Hetimet për këtë rast vazhdojnë, dhe pritet që gjykata të shqyrtojë provat e paraqitura nga të dyja palët.
