Në takimin e 20-të të Komitetit Parlamentar të Stabilizim Asocimit BE-Shqipëri, eurodeputeja Alba Kokalari theksoi rëndësinë historike të momentit për Shqipërinë. Ajo shprehu mbështetje të fortë për anëtarësimin e vendit në Bashkimin Europian, duke thënë se “të gjithë në BE e duan Shqipërinë si anëtare” dhe se në Bruksel po flitet për nevojën e pranimit të saj.
Kokalari u ndje e privilegjuar që ishte në vendin e saj, duke u bërë thirrje si opozitës ashtu edhe mazhorancës për të shfrytëzuar këtë moment unikal për të çuar Shqipërinë drejt integrimit europian. Ajo theksoi se vendi ka luftuar për një kohë të gjatë për liri dhe se tani ka mundësinë më të madhe për të rikthyer Shqipërinë aty ku i përket, në BE.
Duke u referuar debatit të gjatë parlamentar, Kokalari vlerësoi përpjekjet e Kuvendit për të funksionuar dhe e inkurajoi që të tejkalojnë mosmarrëveshjet politike për të realizuar përparim të qëndrueshëm. Ajo nënvizoi se këto është një punë që do të ketë ndikim për gjenerata të tëra.
“Unë nuk kam parë një moment të tillë në BE, ku të gjithë e duan Shqipërinë,” u shpreh Kokalari, duke iu bërë thirrje deputetëve të miratojnë dhe të zbatojnë ligje që do të kontribuonin në integrimin e vendit. Ajo e pranoi se zbatimi i ligjeve është një sfidë, duke e ilustruar këtë me problemet që has edhe BE-ja.
Përfundimisht, Kokalari apeloi për një angazhim serioz nga ana e politikës shqiptare për të realizuar aspiratat e vendit drejt Bashkimit Europian, duke theksuar se tani është në duar të tyre të drejtojnë Shqipërinë në këtë rrugë.
