Presidentja e Kosovës, Vjosa Osmani, ka paralajmëruar se nëse nuk arrihet një marrëveshje për formimin e Qeverisë gjatë seancës së së dielës, ajo do t’i ftojë partitë politike për të shqyrtuar mundësinë që ndonjëra prej tyre të sigurojë 61 votat e nevojshme. Seanca e thirrur për këtë qëllim është planifikuar për në orën 10:00 me një pikë të vetme në rendin e ditës: zgjedhjen e Qeverisë së re.
Osmani ka mandatuar kreun e Lëvizjes Vetëvendosje, Albin Kurti, për të formuar Qeverinë, pas fitores së partisë në zgjedhjet e 9 shkurtit. Megjithatë, mbetet e paqartë nëse Kurti disponon numrin e votave të nevojshme për krijimin e ekzekutivit, pasi presidentja theksoi se është ende herët për të folur për zgjedhje të jashtëzakonshme, të cilat janë një mundësi sipas Kushtetutës në rast të dështimit për formimin e Qeverisë.
Nëse Kurti nuk arrin të krijojë shumicën brenda dhjetë ditëve pas seancës, Osmani do të jetë e obliguar të fillojë konsultime me partitë për të përcaktuar mandatarin e ri. Nëse as pas përpjekjes së dytë nuk arrin të formohet Qeveria, ajo do të shpallë zgjedhje të reja brenda 40 ditësh.
Më 21 tetor, Kurti nënkuptoi se Lëvizja Vetëvendosje mund të përballet me dështim në formimin e Qeverisë, duke sugjeruar se zgjedhjet e reja janë një mundësi reale. Partia e tij ka fituar 48 ulëse në Kuvend, por ka përjashtuar bashkëpunimin me Partinë Demokratike të Kosovës dhe Listën Serbe.
Partia Demokratike e Kosovës disponon 24 ulëse, ndërsa Lidhja Demokratike e Kosovës ka 20 deputetë. Koalicioni i Aleancës për Ardhmërinë e Kosovës dhe Nismës ka tetë ulëse. Komuniteti serb ka dhjetë vende të garantuara në Kuvendin e Kosovës, ku nëntë nga ato i takojnë Listës Serbe, ndërsa një vend është fituar nga Nenad Rashiqi nga Partia për Liri, Drejtësi dhe Mbijetesë. Po ashtu, janë të rezervuara dhjetë vende të tjera për komunitetet e tjera minoritare.
