Eurodeputeti Fredi Beleri, gjatë fjalës së tij në mbledhjen e Komitetit Parlamentar të Stabilizim Asocimit BE-Shqipëri, ngriti shqetësimin për blerjen e votave në zgjedhjet e 11 majit. Edhe pse vetë është i dënuar për korrupsion zgjedhor në hetimet për kandidaturën si kryebashkiak në Himarë, Beleri theksoi se raporti i OSBE/ODIHR e ka konfirmuar përdorimin e parave të shtetit për këtë qëllim.
Beleri u shpreh se është i lumtur që është pjesë e këtij procesi dhe dëshiron të kontribuojë për integrimin e Shqipërisë në Bashkimin Europian. Ai theksoi përvojën e tij personale, duke e kaluar gjysmën e jetës në Shqipëri dhe gjysmën në Greqi, dhe theksoi se ka njohuri mbi dallimet midis tyre. Megjithatë, sipas tij, shumë nga deklaratat për situatën në Shqipëri nuk janë në përputhje me realitetin.
Ai përsëriti se raportet e ODIHR dhe parlamentit Europian kanë dëshmuar se sistemi zgjedhor shqiptar ka probleme të thella, dhe për të qenë i gatshëm për anëtarësim në BE, vendi duhet të përballojë një sërë reformash, të cilat deri tani duken se kanë dështuar. Sipas Belerit, qytetarët e Shqipërisë ndiejnë një mungesë të drejtësisë në gjykata, dhe kjo është një situatë që kërkon patjetër rregullim.
Në përfundim, Beleri theksoi nevojën për të adresuar këto çështje si një kusht për përparimin e vendit drejt anëtarësimit në Bashkimin Europian.
