Partizanit, që nga data 9 qershor e këtij viti, i janë bllokuar të gjitha aksionet për shkak të pagesave të pashlyera të tatimeve. Ky është lajmi i zbuluar nga “Panorama Sport”, që mëson se tashmë drejtuesit e klubit të Partizanit nuk mund të kryejnë asnjë veprim në lidhje me transferime, shitje apo dhurim të aksioneve.
Ky vendim është marrë nga Drejtoria e Mbledhjes së Detyrimeve Tatimore të Papaguara, që konstaton se klubi i kuq nuk ka paguar një total prej rreth 9.5 milionë lekësh (95 milionë lekë të vjetra) detyrime, pavarësisht paralajmërimeve të bëra nga institucionet përkatëse. “Regjistrimet tona tregojnë se tatimpaguesi i sipërcituar nuk ka paguar në afatin e kërkuar ligjor, detyrimet në vlerën 9.486.415 lekë. Tatimpaguesit i është dërguar dokumenti ‘Njoftim dhe kërkesë për të paguar’, por ai nuk është paguar ende.
Këto detyrime janë subjekt i masave shtrënguese në përputhje me legjislacionin përkatës tatimor. Drejtoria e Mbledhjes së Detyrimeve Tatimore të Papaguara, Rajoni Qendror, nëpërmjet kësaj mase, synon që në Qendrën Kombëtare të Biznesit, të mos lejohet tjetërsimi mbi pasurinë dhe të drejtat e tjera pasurore, që i përkasin këtij tatimpaguesi, deri në shlyerjen e plotë të detyrimeve tatimore. Kjo masë vendoset edhe në të gjitha shoqëritë, ku tatimpaguesi ka pjesëmarrje në kapital”, shkruhet ndër të tjera në vendim. Mbetet të shihet se çfarë do të ndodhë në vijim në lidhje me këtë çështje, me klubin e kuq, që në vitet e fundit nuk ka pasur çështje të tilla detyrimesh dhe është treguar një nga më korrektët e elitës së futbollit tonë.
Faksimile e vendimit të marrë ndaj klubit të Partizanit
