Situata e Endrick Felipe te Real Madrid ka filluar të komplikohet, teksa sulmuesi brazilian, i rikuperuar plotësisht pas gati dy muajsh, nuk ka debutuar ende këtë sezon nën drejtimin e Xabi Alonsos. Mungesa e minutave në fushë ka nxitur spekulime për një largim të mundshëm në merkaton e janarit.
Sipas “Marca”, Olympique Lyon ka hapur negociatat me Real Madrid për një huazim të Endrick deri në fund të sezonit. Klubi francez e sheh 18-vjeçarin si një përforcim të rëndësishëm për fazën e eliminimit direkt në Europa League, ku Lyon ka pasur një paraqitje të shkëlqyer, duke siguruar 100% fitore deri tani.
Në verë, Endrick refuzoi oferta nga klube si AC Milan, Juventus, West Ham, Marseille dhe Real Sociedad, duke zgjedhur të qëndronte në “Santiago Bernabéu”. Megjithatë, aktualisht ai është i hapur për një huazim, me kushtin që të mos transferohet në një klub tjetër të La Ligës, pasi ndjen që nuk është i gatshëm të përballet me Real Madridin.
Burime brenda klubit spanjoll tregojnë se Endrick është “shumë i zhgënjyer” nga mungesa e besimit që ka marrë nga trajneri Xabi Alonso, edhe pse ai është përfshirë në tetë ndeshje radhazi në listën e skuadrës pa marrë asnjë minutë lojë. Pas një mungese katër mujorë për shkak të një dëmtimi në kofshë gjatë Kupës së Botës për Klube, Endrick pritet të vendosë për të ardhmen e tij në javët e para të dhjetorit.
Real Madrid duket i hapur për një huazim që do t’i siguronte talentit brazilian më shumë minuta loje dhe eksperiencë, duke e pasur parasysh situatën e tij aktuale në ekip. Kjo marrëveshje potenciale do t’i mundësonte Endrick të zhvillonte lojën, gjë që mund të jetë e rëndësishme për karrierën e tij të ardhshme.
